Òscar arnulfo Romero
Con chèsce quàter rìme
oi regordà ü Prét che stìme.
Da öna faméa modèsta l’è nassìt,
l’éra ‘l segónd de òt fradèi e con lur l’è cressìt.
Prèst, de fàss prèt l’à manifestàt
e a “San Miguèl” in seminàre ‘l sé ritiràt.
L’è dientàt söbet di söperiùr l’atensiù,
per la sò serietà e inclinassiù
a la èta religiüsa e a i stöde,
i l’à mandàt a Roma sènsa döbe.
A “l’Üniversità Pontificia Gregoriana” l’ s’è fürmàt
e ‘n dla”Facoltà de Teologia” ‘l s’è perfesiunàt.
Ol quàter de aprìl del méla növ sént quaranta-du l’è dientàt Prèt
e söbet l’ s’è dàcc de fà per la sò zèt.
Ol vént’ü de zögn del méla növ sènt setanta Vèscov i l’à ordinàt
e, con tace d’óter confradèi ‘l s’è ‘mpegnàt
per töte chi popolassiù sfrötàde
e da la prepotènsa militàr türtüràde,
con d’öna profónda convinsiù
a portà ‘n chèla póvra zét la véra religiù.
La violènsa e catiéria di chi tèp
i à tocàt ol sò cör de Vèscov e Prèt,
quando ü sò amìs e colaboradùr l’ vé asasinàt
e sènsa rispèt ol “Signùr” i à profanàt,
cèse distrugìde e brusàde
e tante persùne copàde.
I sò prèdiche e i sò opiniù
e v’ègnia trasmetìde da la radio e da la televisiù
e i portàa a conoscènsa mondiàl
töt chèl che l’ söcedia de anticlericàl
‘n chèla Nassiù de guère contrastàda
e dla sò popolassiù türtüràda.
Ol vènte quàter de mars del méla növ sènt-otanta, ‘ntàt che la mèsa ‘l celebràa
sènsa giöstificassiù i lo copàa,
l’éra apéna finìt de dì
che ‘l vegnìa obligàcc tance s-cètì
a ‘ndà inàcc ‘n di camp minàcc
e da esplosiù improìse asasinàcc.
Òscar Arnulfo Romero ‘n del momènt dla consacrassiù
co la sò mórt l’à portàt ol sò pòpol a la liberassiù.
Ol venté trè de mas del duméla e quindès l’ vegnerà beatificàt,
“Papa Francèsco” l’à ricognossìt che per la sò zèt l’ s’è sacrificàt.
Amadio
Albino, 31 marzo 2015 “Auditorium Mario e Benvenuto Cuminetti”
Tavola rotonda “Ho udito il grido del mio popolo”
a ricordo del martirio del Vescovo “Òscar Arnulfo Romero”
