LA SANTÈLA di “PRÁCC MOLÈCC”
L’è passàt agn e stagiù
zét e generassiù,
ol tép e i stretèp i à mai cancelàt
chèl che i nòsc vècc i éra fabricàt,
in di agn a l’abandù lassàda
e da piö nissü cüràda;
ü möcc de plòch töcc ‘n ruìna
l’ cresìa ìrna e ranìna,
i osèi e i animài i se fermàa a possà
sö la paghèra che la gh’à fàcc sèmper de guardià.
Ü Alpino, ü dé, da sti bande l’é passàt,
…l’ s’è fermàt ü momènt e l’à oservàt,
e tra lu l’à dicc:”Che! bisògna dàs de fà,
mé stà Santèla la öi sistemà”.
Söbèt l’à comensàt i laurà
con tante persune piene de òia e olontà.
Ecola che“La Santèla di Pràcc Molècc” sistemàda
e ‘ncö col Sindèch e i ütorità ‘n s’è che a inaügüràla,
con du bèle bandére e la campanèla,
la par piö gnach chèla,
I plòch e ‘l tècc i à ciapàt ol sò colùr
e l’èrba ‘nturèn ol sò vigùr.
Puntàt in vèrsa ‘l cèl ü bèl canù
co la bóca èrta l’ pàr domandà perdù
a töte chi persune copàde
e col tèp desmentegàde.
Öna córna töta laoràda
con d’öna crus doràda,
fàcia de fél spinàt
e ü bòsol de canù recüperàt
per regordà chi soldàcc, alpini e carabinér
mórcc ‘n de l’ fà l’ sò doér.
Circondàda da ü bèl stecàt
la par che la öle parlàt
la orès cüntà la sò stòria
passàda ormài a la memòria.
Oh! viandànt che te passèt de sti bande
sentezó a l’ombra de la paghéra a fa possà i gambe,
intàt, denàcc a stó bèl münümènt
rècita öna preghiéra con sentimènt,
per töte chi persune e soldàcc che con amùr
i à servìt la nòsta Italia con unùr.
Amadio
Dossello di Albino, 6 giugno 2015
inaugurazione “Santella Prati Moletti”
